1 წუთის საკითხავი
ისეთ ინტიმურ თემაზე საუბარი, როგორიც მაგალითად მენსტრუაციაა, შეიძლება უხერხულობას იწვევდეს როგორც მშობლისთვის, ისე – ბავშვისთვის. მაგრამ ბავშვს სჭირდება სანდო ინფორმაცია, რომელიც სჯობს რომ სწორედ თქვენგან, მშობლისგან მოისმინოს.
როდის?
- დაიწყეთ ადრე: არ არსებობს რაღაც კონკრეტული ასაკი. ესაუბრეთ რეპროდუქციულ ჯანმრთელობაზე მცირე ასაკიდანვე ისე, როგორც საუბრობთ სწორ კვებაზე ან საკმარის ძილზე;
- გამოიყენეთ შესაძლებლობა: როცა ბავშვი ინტერესს გამოიჩენს, უპასუხეთ მას მარტივად და პირდაპირ. მაგალითად, არ წაუყრუოთ შეკითხვას ჰიგიენური საფენების შესახებ. მაგ: 5 წლის ბავშვს მის ენაზე აუხსენით, რომ ქალებს აქვთ ყოველთვიურად მცირე სისხლდენა საშოდან, რასაც მენსტრუაცია ეწოდება. რომ ამით, ქალის სხეული ბავშვის გასაჩენად ემზადება;
- განაგრძეთ საუბარი: საჭიროებისამებრ მიუბრუნდით ამ თემას და ზრდასთან ერთად მიაწოდეთ მეტი ინფორმაცია;
- ასაკი: გოგონების უმეტესობას მენსტრუალური ციკლი 10-დან 15 წლამდე ეწყება. თუ აქამდე არ გისაუბრიათ, აუცილებლად განიხილეთ ეს საკითხი ამ ასაკის მოახლოებამდე.
როგორ?
- საუბრის დაწყებამდე გაარკვიეთ, მას რა ინფორმაცია აქვს;
- გამოიყენეთ მარტივი ენა და განმარტებები;
- გაუზიარეთ საკუთარი გამოცდილება;
- განიხილეთ როგორც ფიზიკური, ასევე ემოციური ასპექტები მენსტრუაციის დროს და პრემენსტრუალური სინდრომი (PMS);
- ესაუბრეთ ჰიგიენის მნიშვნელობაზე, გააცანით სხვადასხვა პროდუქტები (ჰიგიენური საფენი, ტამპონი, ჭიქა) და მათი მოხმარების წესები;
- წაახალისეთ შეკითხვები და ღია დიალოგი;
- მენსტრუაცია ღია თემა უნდა იყოს როგორც გოგოებისთვის, ასევე ბიჭებისთვის – მათაც მიაწოდეთ საჭირო ინფორმაცია, რომ შეამციროთ სტიგმა და ხელი შეუწყოთ ურთიერთგაგებას.
- თუ ამ თემაზე საუბარი ძალიან გეუხერხულებათ, დაიხმარეთ საგანმანათლებლო ვიდეოები ან სტატიები. შეგიძლიათ ეს საქმე ოჯახის სხვა წევრს, ან პირად ექიმს მიანდოთ. მხოლოდ დარწმუნდით, რომ თქვენი შვილი აუცილებლად მიიღებს სანდო და საჭირო ინფორმაციას.